කන්දට නම් තැබීම – මාරි මුත්තු සිව කුමාර්

මාරි මුත්තු සිවකුමාර්

කන්දට නම් තැබීමේ උත්සවය…

මේ කන්දට නමක් තැබීමට
උත්සවයක්‌ සූදානම් වුණා…..
කන්දට නමක් තේරීමට
මා හටද ආරාධනා ලැබුණා……

වසර ගානක් පැරණි කන්දට
නමක් සොයන්න මා
බොහෝ උත්සහ කළා …

තම පක්ෂයේ නිර්මාණකරුගේ නම
මේ කන්දට සුදුසු යැයි ඇතැමෙක් මට කිව්වා..
තමන් මේ කන්ද දරා ගත් බවත් ,
එනිසා තමන්ගේ නම කන්දට යොදන ලෙසත් , තව පිරිසක් නිර්දේශ කළා….
කන්ද පෝෂණය කල බව කියන තවත් පිරිසක්
තවත් “නමක්’ මා වෙත රැගෙන ආවා ….

ඒ කුමන බලපෑම් තිබුනත් ඒවා නොතකා
කන්ද වෙනුවෙන් නමක් තැබීමේ උත්සවයට මා පැමිණියෙමි.

කඳු බෑවුම පාමුල ඉදිරියේ සිට ,
කන්ද වෙනුවෙන්ම මා නිර්මාණය කල “නම “
මුලින්ම කන්ද වෙත මා රහසින් කීමට ලං වුණේමි.

මගේ කටහඬ ඇසූ කන්ද,
මා දෙස කෝපයෙන් මෙන් බලා, හඬා වැටුණි.
එහි වූ දෙ ඇස් වලින් ලේ ගලනු මා දුටුවෙමි…..

අපගේම කුසගින්න ගැන , අයිතීන් ගැන ,
දුක් කම්කටොළු ගැන ,
අපව රැවටූ මහා බලකණු ගැන
කිසිවක් නොකළ ,කිසිදු විසඳුමක් නොසෙවූ මා …
කන්දට නම් සෙවීමට මෙපමණ මහන්සිවීම ගැන
කන්ද සිටියේම නොසතුටෙනි … පුදුමයෙනි …